2022 йил 20 март куни Самарқанд шаҳридаги А.Навоий кўчасида Ўзбекистон Ошпазлар уюшмаси ва Самарқанд вилояти ҳокимлиги ҳамкорлигида “Наврўз гастро фестивал” бўлиб ўтди. Тадбир Наврўз умумхалқ байрами арафасида ташкил этилган бўлиб, миллий таомларимизнинг бой анъаналарини кенг тарғиб қилиш, ҳаваскор ва профессионал ошпазларни қўллаб-қувватлаш ҳамда мамлакатимизнинг гастрономик салоҳиятини дунёга танитиш мақсадида ўтказилди.

Фестиваль доирасида миллий таомлар бўйича бир қатор танловлар ташкил этилди. Жумладан, кабоб-шашлик бўйича кўрик-танлов 5 та йўналишда ўтказилди:

 • “Қийма” кабоб;

 • Мол гўштидан кабоб;

 • Қўй гўштидан кабоб;

 • Товуқ гўштидан кабоб;

 • Ижодий ёндашув асосида аралаш (микс) кабоб тайёрлаш.

Шунингдек, ошпазлар ўртасида палов-ош, сумалак ва халиса тайёрлаш бўйича беллашувлар ўтказилди. Сомсапазлар эса сомса ва бичак тайёрлашда ўз маҳоратини намоён қилишди.

Тадбир якунида ғолиблар ва барча иштирокчиларга махсус совринлар, сертификат ҳамда дипломлар топширилди.